اعمل ايه بس يااااااربي؟؟؟؟

اول حاجه ازيكوا بس عشان ماتتخضوش من العنوان ؟

انا ياجماعه دلوقتي خدت الأجازه ماشي؟(ده المفروض يعني )

مش بخرج خااااااااااالص ياما نايمه ياما بتفرج علي مسلسل نور التركي بتاع مهند عارفينه طبعا.

مشكلتي بقا ان انا كنت واخده اني انزل اروح الدروس واروح المدرسه وكده اه كانت بتبقا حاجات رخمه وكنت ساعتها ببقا مخنوقه واقول (ياساتر امتي بقا اخلص من الهم ده )وبعد مالنتيجه طلعت ويعني اقدر اقول اني نجحت والحمدلله علي اي حال .

بصوا بقا :اول مااخدت الأجازه ماكنتش حاسه بطعمها لأني كنت شايله هم النتيجه وبعد مالنتيجه طلعت ادايقت شويه وبعد كده بقيت عاديه جداا لأني الحمدلله نجحت يعني بس انا حسيت وقتها ان انا مش عارفه اعيش من غير مافكر في حاجه تدايقني ههههههههههه.

انا مش معقده والله بس مجرد تفكير في السنه الجايه واني لازم اذاكر كويس جداااااا لأني بجد اتدلعت اووووي السنه دي وكانت ثقتي بنفسي هي العامل الأساسي اني ماهتمش بمذاكرتي من اول السنه يعني يادوب كنت بروح المدرسه واجي من المدرسه انام ولما اصحي اروح الدرس ايا كان بقي،وبعد مارجع اقعد شويه وبعدين انام.

جيت بقا في الأخر بقيت اذاكر واتدلع لحد ماحسيت ان يوم امتحان العربي قرب خاصه ان العربي احنا مش بناخده من اول السنه لأني بعتبره تضييع وقت علي الفاضي لأنه مش محتاج يعني والعربي مادة سهله.

واول ماحسيت اني لازم اذاكر بقي واهتم بالمذاكره شويه بالفعل قعدت في البيت وماكنتش بنزل الا للدرس وبس وبقيت بجد بذاكر لحد ماربنا كرمني وخلصت منهج العربي كله في اربع ايام بس.

ومش قادره اوصفلكم شعوري لما خلصت ياسلام لما تحس ان ضميرك مرتاح وكفايه ان المذاكره دي حاجه بتسعد ربنا منك.

المهم حسيت اني ريحت ضميري وخلصت منهج العربي .وجيت بقا يوم الأمتحان كنت خايفه جدا لأني اول مره ادخل امتحان ثانويه عامه وكده انتوا عارفين طبعا؟

المهم دخلت الأمتحان وبجد ربنا كرمني اووووووي والعربي هو اكتر درجه انا جايباها في المواد كلها يعني هههههههههه.

وبعديه الرياضه وبعديه الانجليزي وبعديه الفرنساوي وطبعا اخر حاجه الحاجه الكيميا هههههههههههه.

المهم ان السنه عدت والحمدلله وانا نسيت النتيجه بس لازم اقرص علي نفسي بجد السنه الجايه واللي ميتعلمش من اخطاؤه يبقا ايه ياجماعه؟

ها؟

مش هتقولوا طبعا عشان مش عايزين تغلطوا فيا .لا ياجماعه ماهو مش انا بس ده اي حد مش هيتعلم من غلطه هيبقا اييييييه؟

خلاص انا هقول اللي مايتعلمش من غلطه يبقا ايه؟ يبقا ايه؟ يبقا (حمااااااااار).هههههههههههههههه.

بس انا ان شاء الله هشوف كل السلبيات اللي انا عملتها وهحاول اخليها بأذن الله ايجابيات وهحاول علي قد ماقدر اني استعيد ثقه ناس كتير اوي فيا .

طبعا انا اساسا خرجت عن الموضوع الأساسي بس معلش انا كنت عايزه افتكر الأيام دي.

اه انا بقا كنت بقول ان الدروس بعد ماكنت بتخنق منها لأن بصراحه كان بيبقا عندي في اليوم حوالي 3 دروس والله وكنت في الفتره الأخيره بتخنق من كده.

دلوقتي بقا بقول فين بس الدروس علي الأقل كنت بعمل حاجه بس عارفين انا اتغيرت كتير اووووووي.

في ايه بقا؟اني وانا صغيره كانت بالنسبه لي مذاكرتي دي كل حياااتي لدرجه اني علي نص درجه كنت بعمل للمدرس شغلانه والله ههههه.

وكمان كنت بستني لما كتب السنه الجديده تنزل في المدرسه عشان اشتريها واعرف المنهج الجديد وبالفعل كنت بذاكر وبحل كمان.(في الأجازه يعني).

بجد كنت شاطره اوي والله انا مش بشكر في نفسي عشان متفهموش غلط انا قلت ان المدونه دي هتبقي صاحبتي وانا دلوقتي بفتكر معاها ذكرياتي ههههههههههه.

دلوقتي بقا اصبحت فيا حاجه غربيه اوي اني لما اكون في الدراسه اتخنق من المذاكره وفي الأجازه اشتاقلها اووووووي بجد.

انتوا عارفين انا من كام يوم كنت هطلع ملازم الجبر واقعد احل فيها والله العظيم.

وكمان بصوا عملت ايه؟

انا ليله امتحان الكيميا كنت بدور علي ملزمه الباب السابع ههههههه ووقعت في ايدي ملزمه رياضه ولقيت نفسي سايبه مسأله قولت والله دي ان شاء الله ماكنتش عارفه احلها ليه وسبت الكيميا وقعدت حليت المسأله ههههههه مع اني كنت امتحنت الرياضه خلاص والكيميا كانت اخر ماده ليا بقي .(لأن بجد المدرس اللي كان بيديني رياضه الله يمسيه بالخير بقي كان محببني فيها اوي بجد)

المهم اني بجد اتغيرت اوي من ناحيه المذاكره بس لاء والله انا بجد السنه الجايه هرجع زي زمان ويلا كلها سنه واخلص من الثانويه العامه وقرفها خاصه ان انا دايما حظي ايه فل يعني ماشاء الله الوزير الجديد جيه علي حظي ربنا ياخده ياااااارب ادعو معايا.

وعايزه اخرج بقا زهقت مش بعمل دلوقتي الا الحاجات اللي قولتلكوا عليها ياما نايمه ياما بتفرج علي مهند يااما طبعا قاعده علي النت لحد ماايدي بتورم ههههههههههههه.

عايزه اخرج خروجه محترمه لأن خروجاتي كلها مش نايس يعني اخري تمشيه صغيره او عند حد من صحابي مش حكايه صعوبه في الخروج مع انها عامل من العوامل برده هههههههههههه.بس لأني مش متشجعه علي الخروج من صحابي الفقريين ههههههههه.

لازم يطلعولي عقده في كل حاجه حتي كان نفسي اروح متش الأهلي والزمالك وانتيمي قاللي اروح معاه بس طبعا الماتش الساعه 8.30 او 9 مش متذكره وطبيعي اني مش هينفع اجي متأخره غير طبعا ان بعض الماتش هلاقي الشوارع ايه ماقولكوش ههههههههه.

بس يلا هاقعد اتفرج في البيت وخلاص نصيبي هعمل ايه يعني هههههههه.

طبعا رغيييييييت كتير اووووووي واللي قرا اكيد بيقول ايه البت البارده التنحه الرغايه دي صح؟ههههههههههه.

بس والله انا بحب اشارككم معايا وبحب افضفض عن نفسي لأني الأيام دي محرومه من انتيمتي لأنها مشغوله حبتين هههههههه.

واخر كلمه بقا :من الأخر اللي بيخرج يقول يعني مش هحسده طالبه منك تشجيع مش اكتر شجعوني علي الخروج انا زهقانه ومش عارفه ايه المكان اللي يخليني مازهقش انا نفسي اروح قصر النيل ههههههههههه.

ايه رأيكوا ؟

قولي بقا هتاخدني فين في رأس السنه هههههههههههههههه(طبعا دي مقوله الست أطاطا)عارفينها اكيد يعني.

بس لاء هو انا لسه هستني لرأس السنه ان شاء الله ؟لا طبعا انا هفكر في مكان واخرج بسررررررررررعه .

وهبقا اقولكوا بعدين عشان مش هاخد حد معايا انا بقول اهو عشان في ناس لزقه بغرة بعيد عنكم ههههههههه.

المهم اني هحاول اخرج