CLICK HERE FOR THOUSANDS OF FREE BLOGGER TEMPLATES »

الأحد، 17 يناير، 2010

نفسك ف ايه؟


كل واحد فينا اكيد نفسه .......

انا قلت نفسه وسكت لإني حسيت اني لما هكتب نفسه في حاجة هتبقي حاجة واحدة بس لكن دة مش صح.

كل واحد فينا نفسه في حاجات كتير اوي اوي مش حاجة واحدة يعني عندكم انا مثلا كل مابفكر بحس ان امنياتي بتختلف من وقت تاني وكلمة نفسي اللي بييجي بعدها بيتغير كل مابكبر او بتحصل حاجة ف حياتي جديدة ببني عليها احلامي وطموحاتي.

يعني وانا ف ابتدائي كنت شاطرة جدا كان كله يقول عليا ممتازة وعبقرية ماكنتش افهم اني اقول عايزة ابقي كذا...

ولما طلعت اعدادي قلت نفسي اكون دكتورة وكان كل الناس واساتذتي يقولوي يادكتورة وبعد ماخلصت اعدادي دخلت ثانوي وكتبت (علمي)ومع بدايه 2 ثانوي وبعد ماكتبت الاستماره (علمي علوم) اترددت وبقيت احلم اني ادخل هندسة وانا اساسا كانت مدرستي بعد كليه الهندسة اللي تبع جامعة عين شمس كنت امشي من جمبها واتنفس ريحتها واحلم اني ادخل هندسة قسم معماري .

وبعد فتره لقيت احلامي كلها بتتهد ابتديت استهون وحاجات تانيه تشدني حسيت اني مش عايزة لا هندسة ولا طب ولا اي حاجة كبرت ف دماغي فكرة(الغنا)وان ناس كتير شهدت لي ان صوتي حلو وقوي والمدرسين بقوا يقولولي يافنانة مش يادكتورة ههههههههههه

واصحابي كانو مسجلين لي اغنيه ماتشغلش بالك بيا بتاعت هيثم شاكر علي موبايلاتهم ولما اجي ارن عليهم تيجي النغمة بصوتي كنت متشجعة جدا وجاتلي فرصة اني اغني بس كان في مدرس بيحبني جدا اقنعني انه حرام وقال لاصحابي ميشجعونيش علي كدة.

وشلت الموضوع من دماغي لحد مابقيت (بلا هدف)واحدة واحدة بقيت ازهق من المذاكرة وجبت مجموع مش حلو وحولت ادبي وكنت بذاكر وانا مش ف دماغي غير اني ادخل حاجة فيها كمبيوتر لاني بحب الكمبيوتر ولما جبت مجموع كلية الحقوق دخلتها ويارتني ياريتني مادخلتها

ههههههههه.

انا اساسا كل اللي بكتبه دة عشان اقول انا نفسي ف ايه مش قادرة اقولكم حالي دلوقتي ازاي؟؟

قاعدة ادام ملزمة بتشرح اسئلة مادة رخمة وثقيلة اوي وصعبة اوي اوي ماسمعتش عنها ولا مرة ولا من اي حد كلمة خير طبعا اكيد سمعته عنها(القانون الدستوري والنظم السياسية)نفسي اخلص الملزمة دي وافهمها عشان ادخل ع الملزمة التانيه بقي ههههههههههه

شفتوا احلامي فضلت تقل لحد ماوصلت لفين هههههههههههههه اني انا ملزمة تتشطر عليا واترجاها انها تخلص هو دة بجد اللي نفسي فيه دلوقتي والحلم الاكبر اني اتخرج واشتغل حاجة كويسة كدة واطلع منها علي خيييييييييير.

(ادعووووووولي)

الأربعاء، 6 يناير، 2010

بعد غياب طويل!!!


اول حاجة ازيكو؟؟

بجد كنت مفتقداكم جدا ارائكم وهزاركم وتوجيهاتكم ليا ودعواتكم وحبكم الاخوي ليا بجد كل دة كنت مفتقداه جدا...

بعد المدة اللي انا غبتها كنت مقررة اني ابتعد عن التدوين وكدة حسيت اني عايزة اعمل حاجة افضل او حاجه متطورة عن كدة بس اول حاجة جت ف بالي انتوا طبعا واللي خلاني اتراجع بجد لما فتحت المدونة وقريت تعليقاتكم وافتكرت كل واحد فيكم بجد الابتسامة كانت ماليه كل ملامحي وخاصة الناس اللي اعرفهم من مدة ليهم معزة وغلاوة عندي كبيرة اوي...

كنت تقريبا قربت انسي ازاي اكتب الرسالة وازاي اظبط المدونة بس مره علي مرة افتكرت واختي موني فكرتني وشجعتني لما شفت المدونة بتاعتها وانكم لسه فاكرينها شجعتني اني ارجعلكم تاني واعرف انكم ناس بجد مش عاديه وعندكم اصالة ومش بتنسوا بسهوله لانكم من جواكم حاجة غاليه ومليانة احترام واخلاق عاليه...

بجد وحشتوني جدا...

يمكن النهارده موضوعي هيبقي غريب شوية وهتستغربوا منه

يمكن الشخص اللي هتكلم عنه مش كلكم بتحبوا وكتير منكم واخد منه موقف بس انا لما هتكلم هبتعد عن حياته الشخصيه هتكلم عنها ف جانب واحد بس انه غير ديانته وتحول الي مسلم وسمي نفسه (ميكائيل)الشخص ده ياجماعة ((مايكل جاكسون))

حقيقي الانسان ده انا معرفتوش ولا حطيته ف دماغي الا بعد وفاته اللي لفت نظري ليه اخويا كان دايما يشغل اغانيه وكنت اقوله يابني ايه الارف ده اقفل ..

ولما قعدت مع نفسي قلت طيب ماحاول اسمع اغنيه كدة اكيد فنان كبير زيه كده ليه اغاني حلوة حتي لو كنت مش بحبه

وبالفعل سمعت اغنيه ليه وكانت اول مره اسمعله فيها كانت اغنيه اسمها(you are not alone)

حقيقي الاغنيه دي فعلا حلوة جدا ومعانيها وكلماتها تحفة ومرة علي مرة ابتديت اسمعله اغنيه ورا اغنيه لحد مابقيت بجد بعشقه مش بحبه بس

يمكن كتير هينتقدوه ف حاجات كتير بس مافيش اي واحد فينا هيقدر يعرف حقيقة اي فنان لاننا بمعني اصح معشرناهوش ومن المعروف ان الاعلام دايما بيزود عشان يزود افكاره ومصادره حتي لو كانت متألفة ومش حقيقية(سوري يااستاذه موني)

عارفين بقيت انا دلوقتي اللي اجيب اخر اخباره قبل الوفاة واتفرج علي كليباته واجيب كلمات اغانيه وادور علي صور ليه واحطها كمان باك جرواند ع الديسك توب

وكمان ازعل لو حد غلط فيه يعني من الاخر خلي بالكوا؟؟؟

بس فكل اللي عايزة اقولهولكم انه بجد فنان وموسيقار وراقص عبقري بيعمل بجد حركات فظيعه وصوته رقيق واغانيه كلها ليها فكرة مختلفه بجد ظاهره مختلفه عمرها ماهتتكرر...

ربنا يرحمه ويتقبل اسلامه ويارب انتوا كمان تتقبلوا البوست بتاعي وميكونش تقيل عليكم

وبالنسبة لاني غبت عنكم هقولكم اخباري..

انا دلوقتي بقيت عندي 18 سنة ودخلت كلية حقوق جامعه عين شمس وامتحاناتي كمان 18 يوم ومش عارفه اي حاجة ف اي حاجه

حاسة انكم هتقولو عليا فاشلة والله علي طول اكلمكم ايام امتحانات واقولكم انا مش عارفه اي حاجه ههههههههههه صح؟؟؟

لا بس هذاكر يعني ادعولي وياريت كل واحد يقرا البوست بتاعي يقولي رأيه ف مايكل ويطمني علي نفسه واخر اخباره..

يارب تكونوا بخير

الأربعاء، 5 نوفمبر، 2008

وحشتوووووووووووني

ازيكوا؟؟؟
بجد وحشتوني اوي ومفتقداكم اكتر بكتيييييييير وحشنتني تعليقاتكم وكلامكم وارائكم اللي كانت بتفرق معايا في حاجات كتير اوي وبتكمل لي وجهة نظري ...
بس معلش بقي الدراسة من ساعة مابدأت وانا مطحونة في الدروس والمدرسة ووقتي بقي ضيق جداااااااااااااا!
ادعولي ياجماعه ربنا يوفقني السنة د
ي واقدر اجيب مجموع نايس يخليني ادخل الكليه اللي الاقي نفسي فيها،انتوا عارفين انا جوايا ليكو كلام كتير جدا بس حاسة اني لو كتبته كله هيبقي مالوش اي علاقه ببعضه لانه مختلف يعني عايزة اتطمن عليكوا واحكيلكو واهزر معاكو .
يارب كلكم تكونوا بالف خير وسلامة وسعادة وصحة وكل حاجه جميله لان انتوا بجد حاجة جميلة جدا في حياتي يارب تكونو فعلا بخير
هطلب بقي منكم طلب لاني مش هقدر ادخل علي كل مدونة زي زمان لان عندي درس وامتحان بقي واييه؟؟؟
كل واحد هيقرا البوست ده في تعليقه يطمني علي نفسه وحياته وانا ان شاء الله في اقرب فرصه هدخل واقرا واتطمن عليكو لان بجد وحشتوووووووووني..
وادعولي عشان اخلص بقي من الثانوية العامة وقرفها وافضي كدة واقعد ع النت ومعاكو زي زماااااااااان فاكرين؟؟
كنت علي طول ع النت وعلي طول معاكوا وعارفه اخباركوا بس بجد لما بعدت عن المدونة حسيت بالفرق وبالجزء الناقص اللي كان قرب يكتمل جوايا بس الدرلسة الله يسامحها بقي!!!
اتفقنا بقي عشان مش عايزة ارغي كل واحد هيقرا البوست في تعليقه يطمني علي نفسه ده لو حد علق اساسا انا حاسه انكم نسيتوني بس يلا بقي قولتكم سامحوني ويارب تكونوا كلكم بخير واللي بيدرس ربنا يوفقه واللي مابيدرسش ربنا يوفقه برده.
واللي مريح بقي ولا دراسه ولا غيره ياااااااااااسلااااااااااااام بيتهيألي مش محتاج دعوة وعلي فكره مش بحسد عشان عارفه الامخاخ التحفه يعني ههههههههههههههههههه
يلا ربنا مع الجمييييع
اختكم شيتوس

الخميس، 18 سبتمبر، 2008

يانووووور عيني


ازيكم كلكم؟؟ يارب تكونوا بخير

انا البوست اللي هكتبه اختي اتكلمت عليه ويمكن تقول اني بقلدها هههههههههههههه بس لا والله ياموني انا كمان حاسة اني عايزة اكتب وكمان انتي لما قلتيلي كتبت علي نور قلتلك انا كنت هكتب انا كمان معلش بقي حصل خير..

اللي حصل ياجماعة ان انا كنت قايلة لكم في البوست اللي فات اني كان ليا اخت حامل وهي الحمدلله ولدت وجابت(نورسين) بالمناسبة معني اسمها يعني(ضوء القمر) بجد ياجماعة نور دي نستني كل حاجه كنت شايلة همها وكفايه براءة وشها

انا ليا اختين غير جهاد متجوزين وبرده مخلفين وكدة بس جهاد دي حاجه تانيه لانها اقرب واحدة ليا وبجد بحبها اووووي

مش قادرة اقولكم اليوم اللي كانت بتولد فيه كنت عاملة ازاي بس الحمدلله انها قامت بالسلامة انا ياجماعة فرحانه اوي بجد ومن كتر فرحتي حاسة اني مش عارفه اكتب كل اللي عايزة اقوله الحمدلله وعلي فكرة انا لحد دلوقتي والله مش مصدقه ان جهاد بقت ام مش بصدق الا لما

بشيل نور وابوسها واحس بالحقيقه اللي انا فيها فعلا حبيت اشارككم معايا فرحتي ويارب انتوا كمان تحصل كل حاجه تخليكوا فرحانين ومبسوطين وان شاء الله هكتب بوست تاني عليها بس هقوم دلوقتي لانها بتعيط ومفتحه عنيها وانا عايزه العب بيها

تصبحوا علي خيييير