CLICK HERE FOR THOUSANDS OF FREE BLOGGER TEMPLATES »

الأحد، 17 يناير 2010

نفسك ف ايه؟


كل واحد فينا اكيد نفسه .......

انا قلت نفسه وسكت لإني حسيت اني لما هكتب نفسه في حاجة هتبقي حاجة واحدة بس لكن دة مش صح.

كل واحد فينا نفسه في حاجات كتير اوي اوي مش حاجة واحدة يعني عندكم انا مثلا كل مابفكر بحس ان امنياتي بتختلف من وقت تاني وكلمة نفسي اللي بييجي بعدها بيتغير كل مابكبر او بتحصل حاجة ف حياتي جديدة ببني عليها احلامي وطموحاتي.

يعني وانا ف ابتدائي كنت شاطرة جدا كان كله يقول عليا ممتازة وعبقرية ماكنتش افهم اني اقول عايزة ابقي كذا...

ولما طلعت اعدادي قلت نفسي اكون دكتورة وكان كل الناس واساتذتي يقولوي يادكتورة وبعد ماخلصت اعدادي دخلت ثانوي وكتبت (علمي)ومع بدايه 2 ثانوي وبعد ماكتبت الاستماره (علمي علوم) اترددت وبقيت احلم اني ادخل هندسة وانا اساسا كانت مدرستي بعد كليه الهندسة اللي تبع جامعة عين شمس كنت امشي من جمبها واتنفس ريحتها واحلم اني ادخل هندسة قسم معماري .

وبعد فتره لقيت احلامي كلها بتتهد ابتديت استهون وحاجات تانيه تشدني حسيت اني مش عايزة لا هندسة ولا طب ولا اي حاجة كبرت ف دماغي فكرة(الغنا)وان ناس كتير شهدت لي ان صوتي حلو وقوي والمدرسين بقوا يقولولي يافنانة مش يادكتورة ههههههههههه

واصحابي كانو مسجلين لي اغنيه ماتشغلش بالك بيا بتاعت هيثم شاكر علي موبايلاتهم ولما اجي ارن عليهم تيجي النغمة بصوتي كنت متشجعة جدا وجاتلي فرصة اني اغني بس كان في مدرس بيحبني جدا اقنعني انه حرام وقال لاصحابي ميشجعونيش علي كدة.

وشلت الموضوع من دماغي لحد مابقيت (بلا هدف)واحدة واحدة بقيت ازهق من المذاكرة وجبت مجموع مش حلو وحولت ادبي وكنت بذاكر وانا مش ف دماغي غير اني ادخل حاجة فيها كمبيوتر لاني بحب الكمبيوتر ولما جبت مجموع كلية الحقوق دخلتها ويارتني ياريتني مادخلتها

ههههههههه.

انا اساسا كل اللي بكتبه دة عشان اقول انا نفسي ف ايه مش قادرة اقولكم حالي دلوقتي ازاي؟؟

قاعدة ادام ملزمة بتشرح اسئلة مادة رخمة وثقيلة اوي وصعبة اوي اوي ماسمعتش عنها ولا مرة ولا من اي حد كلمة خير طبعا اكيد سمعته عنها(القانون الدستوري والنظم السياسية)نفسي اخلص الملزمة دي وافهمها عشان ادخل ع الملزمة التانيه بقي ههههههههههه

شفتوا احلامي فضلت تقل لحد ماوصلت لفين هههههههههههههه اني انا ملزمة تتشطر عليا واترجاها انها تخلص هو دة بجد اللي نفسي فيه دلوقتي والحلم الاكبر اني اتخرج واشتغل حاجة كويسة كدة واطلع منها علي خيييييييييير.

(ادعووووووولي)

6 شووووووط:

غير معرف يقول...

http://fahmynadem.blogspot.com/

غير معرف يقول...

يعنى انا مقتنع بالحكمة اللى بتقول " حب ماتعمل حتى تعمل ماتحب " يعنى شد حيلك وحبى المجال اللى انتى فيه حتى لو مش هو اللى اتمنتيه عشان توصل لهدف وامنية من خلال كلية حقوق تكونى بتحبيها يعنى ممكن تكونى محامية دولية واكيد هيبقا شغلك على الكمبيوتر والنت والغات وممكن تاخدى كورسات فى الحاجات اللى بتحبيها بجانب درستك للحقوق يعنى الحياة والاحلام مش بتقف عند طريق معين يارب اكون افدتك

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

givara يقول...

الصبر والأراده والمثابره
كل هؤلاء ان تحلينا بهم عانقتنا الدنيا
احسنتى
بوست اكثر من رائع

Unknown يقول...

تدوينة رائعة


بسسس ياليت لو تكبرين الخط شوي

amr elsharqawy يقول...

بتعليقى ده تكون انتا اتخرجت \
بس كلامك بينطبق على ناس كتير